Suleqatigiit

EMJ-Atconip, Permagreenip aamma MT Højgaardip akornanni qanimut suleqatigiinneq aatsitassorsiornissani angisuuni nunatsinneersut peqataanerulernissaat aqqutissiuunneqassaaq.

Arfininngorneq 19. marts Hotel Hans Egede Nuummiittumi oqallinnermi Ineqarnermut, Attaveqarnermut Angallannermullu Naalakkersuisup, Jens B. Frederiksenip, annertuumik kajumissaarutigaa kalaallit suliffeqarfiutaasa ingerlatatik annertusartariaqaraat nukittunerulerlutillu. Akileraartarnermut Atugarissaarnermullu Isumalioqatigiissitap isumaliutissiissutaanik oqallinneq Kalaallit Nunaanni Sulisitsisut Peqatigiiffiannit aaqqissuunneqarpoq, inuiaqatigiillu atugarissaartut ingerlatiinnarnissaanni ineriartorteqqinnissaannilu ukiuni aggersuni unammilligissat annertuut Kalaallit Nunaata qanoq ingerlatissanerai oqallisigineqarluni. Isumaliutissiissut malillugu piumasaqaatit pingaarnerit ilagaat namminersortut annertunerungaartumik angininngortariaqartut.

Isumaqarnangajappoq kalaallit sanaartornermi suliffeqarfiutaasa EMJ-Atconip, Permagreenip aamma MT Højgaardip maannakkut suleqatigiilernerat Jens B. Frederiksenip toqqaannartumik kajumissaarutaanut akissutaasoq. Taamaanngilarli, tassami isumaqatigiissut pilersaarummik eqqarsaatigilluakkamik tunngaveqarpoq, taannalu suliffeqarfiit pingasut akornanni piffissami sivisungaatsiartumi oqallisigineqarnikuuvoq. Isumaqatigiissutilli uppernarsarpaa siunissami unammilligassat kalaallit suliffeqarfiutaasa qanoq iliuuseqarfiginissaannut piareersimasut. GA-p 2009-mi siullermeerluni inuussutissarsiorneq pillugu ataatsimeersuartitsinerani angisuumi assigiinngitsut suleqatigiinnissaat suleqatigiiliornissallu ullormut oqaluuserisassaniipput, Naalakkersuisullu arlaleriarlutik oqaatigisarpaat suliffeqarfiit nunatsinneersut ingerlatsinerni nutaani peqataallualissappata taamatut periuseqarneq siumut aqqutissaasoq.

Allat inisseqartinneqartariaqarput

─ Taamaaliussaagummi, immikkoortortami pisortaq Jóannes Niclassen MT Højgaardimeersoq suleqatigiit sinnerlugit oqaaseqartartuusoq oqaluttuarpoq.

─ Kuupik Kleist aamma Jens B. Frederiksen arfinngormat oqallinnermi oqarput kalaallit suliffeqarfii nunani allani ingerlatsivissuarnut "peqqusaartariaqartut". Tamanna nalunngilluinnarparput, suleqatigiinnerpullu taamatut kajumissaarinermut akissutaarpiarpoq. Suliniutit nutaat aallartinneqaraangata aperineqarnissarput qulakkissavarput, namminerlu iliuuseqartassallu tuniniaaffiillu ornittassallutigit, nangippoq.

Suliffeqarfiit taakku pingasut Kalaallit Nunaanni pissutsit tunngavigalugit immikkut tamarmik angisuujupput, kisiannili uuliasiornermi aatsitassarsiornermilu suliffeqarfissuit nunat tamalaaneersut suleqatigissagunikkit nukittunerusariaqarput. MT Højgaard ukiut 50-it sinnerlugit Kalaallit Nunaaniinnikuuvoq, Pergreen 1950-ikkunnili EMJ-Atconilu 1992-imiit, nunatsinni misilittakkat sulianillu ilisimasaqarluarnerup kattunnerisigut suleqatigiiffik isumaqarpoq neqerooruteqarluarsinnaalluni.

─ Qanoq angitigineq nammineq apeqqutaanngilaq, kisiannili aamma piumasaqaaterpassuit malinnissaannut piffissaagallartillugu piareersimanissarput, assersuutigalugu isumannaallisaaneq, inuiaqatigiinni akisussaassuseqarneq assigiinngitsunik ingerlataqaleriataarsinnaaneq, taanalu nunarsuarmi tamani ingerlatsisut suleqatigiinnermi piumasaqaatigisarpaat. Taakku pillugit peqatigiilluta piffissamut sivisuumut politikimik isikkulersuisinnaavugut - tassungalu peqatigitillugu pisinnaasaqarfinnut aalangersimasunut ujartorneqartunut sulisugut ilinniagaqartissinnaallugit, Jóannes Niclassen oqarpoq.

Suliffeqarfiit nunat tamalaaneersut angisuut pilersuisuinut kalaallit suliffeqarfii unammilleqataassagunik allapisinnaanngisaannik suliffeqarfiillu nunanit tamalaaneersut suliniutaannik naleqalersitsisunik neqerooruteqarsinnaasariaqarput.

─ Nukigut kattukkutsigit taamaaliorsinnaavugut. Issittumi sulinermi misilittagaqarluarneq aamma pinngortitamik kulturimillu qanimut ilisimasaqarneq immikkut pisinnaasaqarfiupput, Jóannes Niclassen oqarpoq erseqqissaatigalugulu kalaallit suliffeqarfiinut amerlanerasunut suleqatigiiffiup matuni ammarsinnaagaa.

─ Kalaallit suliffeqarfiisa allat ilanngutsinnissaannut anguniagaqarluni sulinissamut siuttuusinnaavugut. Piumasaqaataaginnarpoq piumassuseqarnissaq siunissamilu piumasaqaatissat malinnissaannut piareersimaneq - tamakkiisumillu suleqatigiinnissaq suliniutigineqarniartoq, oqarpoq.

Periutsit nutaat ilisimasallu nutaat Kalaallit Nunaanniiginnartinneqassapput

Siusinnerusukkut inuussutissarsiornermi suliniutini annertuuni ajornartorsiutaasut ilaganikuuaat suliffeqarfiit angisuut avataaneersut ilisimaligaat suliniut naammassereeraangat annaaneqartarneri. Suleqatigiinnikkut taamaalillunilu suliffeqarfissuit nunanit tamaneersut suliniutaanni peqataalernikkut ilisimalikkat nutaarpassuit Kalaallit Nunaaniitiinnarneqalernissaat suleqatigiiffiup ilimagaa. Taamaaliornikkut sunniutaa nammineq annertusiteqinneqassaaq, tassani pisinnaalikkat nutaat inuussutissarsiornermi nutaanik periarfissalersitsissapput, taakkulu aamma nutaanik pisinnaasaqalersitsissallutik.

─ Tassunga peqatigitillugu isumaqarpugut ingerlatani nutaani peqataalernissamut periarfissap inuusuttorpassuit uagut suliaqarfigisatta iluani ilisinigaqarusulersissagai, Jóannes Niclassen oqarpoq.

Mt Højgaardip suliffeqarfissuani naleqassutsit soorlu suleqatigiinneq, ataqqeqatigiinneq suliamillu ilisimasaqarluarneq isumassarsiffigalugit EMJ-Atcon, Permagreen aamma Kalaallit Nunaanni MT Højgaard isumaqatigiissummut ataatsimoorullugu tunngavissamik isikkulersuipput, taannalu suleqatigiiffiup ingerlatsivigiligassaanut angalalluni ungasinngitsukkut saqqummiunneqassaaq.

Attaveqarfissaq

Jóannes Niclassen

Immikkoortumi pisortaq MT Højgaard

Tlf. Kalaallit Nunaat +299 588 259

Tlf. Qallunaat Nunaat +45 2270 9738

jin@mth.dk